في المقالة دي هنعرض كل التفاصيل الخاصة بمكتب تجنيد اسيوط من عناوين وطرق الوصول لها بالاضافة لبعض التفاصيل والنصايح عند زيارتك لأسيوط
في الغالب الي بيقرا المقال دي من اهل سوهاج لانهم الوحيدين الي تجنيدهم بيتم تخليصة فاسيوط إلي حين يتم انشاء المكتب المتكامل فسوهاج عندهم ، الي بعتبرهم اهلي وناسي وحابب ارحب بيكم باسمي واسم اهل اسيوط كلهم وسامحونا لو كنتم اتعرضتوا لمواقف من ناس بايخة
اقرأ ايضا : مراحل يوم الكشف الطبي في تجنيد اسيوط وخطوات التقديم خطوة بخطوة والاوراق المطلوبة
في اي وقت برحب بأستفساراتكم واسألتكم فالتعليقات (ومتنساش تحط ايميلك وتدوس علي اعلمني علشان يوصلك الرد)
 |
| مكتب تجنيد اسيوط كل ما تحتاج لمعرفته |
عنوان مكتب تجنيد اسيوط
اسيوط - شارع الجمهورية - الشارع المتفرع من شارع الجمهورية اول بنك الامارات دبي
العنوان علي خرائط جوجل
ازاي توصل لمكتب تجنيد اسيوط؟
في كذا طريقة تقدر توصل بيهم لمكتب التجنيد بس السؤال انت جاي عن طريق اية ؟
*بشكل مبدئي علشان توصل لمكتب التجنيد اول ما تطلع من المحطة تقدر تركب تاكسي ب 10 جنية التسعيرة بتاعتة للعلم*
الطريقة الاولي : عن طريق القطر
بين مكتب التجنيد والمحطة حوالي 8 دقايق مشي هحاول ارفق لكم خريطة توضح الطريق ،المهم تنزل من القطر تطلع علي بوابة المحطة (تدي ظهرك للمحطة) هتلقي مكنة atm علي يمينك "بنك مصر" وهتفضل ماشي علي يمينك لحد ما تلقي الكوبري "متطلعوش" (شوف الصور تحت) وزي ما انت ماشي تحت الكوبري واول ما تكون تحت الكوبري بالظبط اسأل عن مكتب التجنيد فين ؟
هيشاوروا لك علي شارع الجمهورية افضل ماشي فيه كدا لحد ما تلقي بنك الامارات دبي علي ايدك الشمال اهو مكتب التجنيد فالشارع بتاعة ده
*ملحوظة هتحس من الخريطة ان المكان بعيد بس فالحقيقة هو مش كدا
ملحوظة كمان: مكتب التجنيد والتعبئة الي فشارع الجمهورية فاسيوط غير مكتب خدمات التجنيد الي فمديرية الامن
محلوظة 3 : ذكرتها تحت بس هذكرها هنا كمان "روح السجل المدني الخاص بيك فبلدك واعمل استخراج لشهادة ميلاد حديثة تحمل الرقم الثلاثي علشان هتحتاجها،لانك لو جيت اسيوط ومش معاك هتدفع 3 اضعاف سعرها
مكتب تجنيد وتعبئة الجمهورية هو الي بيجي عليه اهل اسيوط وسوهاج لتخليص اوراق التجنيد اما التاني بيخدم اهل اسيوط "مش متأكد من المعلومة"
شرح الوصول لمكتب تجنيد وتعبئة الجمهورية باسيوط
 |
| طرق الوصول لفرع تجنيد اسيوط |
 |
| طرق الوصول لفرع تجنيد اسيوط |
 |
| طرق الوصول لفرع تجنيد اسيوط |
 |
| طرق الوصول لفرع تجنيد اسيوط |
 |
| طرق الوصول لفرع تجنيد اسيوط |
الطريقة التانية : عن طريق العربية
لو السواق نزلك فالمعلمين خد تاكس وقولة مكتب التجنيد مع العلم تسعيرة التاكس الرسمية 10ج وعلشان المسافة بعيدة شوية ممكن تديلة 15 ج بس لو عند مكتب التجنيد اتكلم وقال زيادة ،قولة انا عطيك اكتر من حقك ،ولو كان ركب حد معاك استعملها كعامل ضغط عليه قولة انت مش ركبت حد معايا ،وصرف نفسك ولو فتح بقة ،ظابط المرور ف وشك علطول تعامل ،بس ان شاء الله زيارتك هتكون متيسرة
بس كدا دا كل حاجة بالنسبة للوصول
شوية نصايح خلي بالك منهم جامد وانت مشرفنا فاسيوط
1.تسعيرة الاجرة فاسيوط ثابتة 10 جنية وللمسافات البعيدة بتدي السواق اكرامية من عندك 5 جنية زيادة
2.انت وداخل شارع مكتب التجنيد هتلقي ناس واقفين بعلب وهدايا ويقولك افتح وهتكسب والذي منه ،متقفش وكمل لانك هتلبس ومش هتكسب حاجة دول نصابين ومحدش عارف ساكتين عليهم ليه لحد دلوقت
3.مهم جدااا قبل ما تشرفنا فاسيوط روح مكتب السجل المدني التابع ليه ف بلدكم واعمل استخراج شهادة ميلاد حديثة بالرقم الثلاثي "اسمع مني"
4.حاول تجهز كل اوراقك ودنيتك معاك وصور من كل واحدة 5 نسخ زي البطاقة وشهادة ميلاد حديثة برقم ثلاثي وغيرها
5.احسن محل كشري هيكون الحمصاني فقلب المحطة جوا ابقوا جربوه و اطعم محمصة لب فاسيوط هتلقوها فشيكورل "محمصة عزب الحمصاني"
لحد هنا المقالة انتهت،يارب اكون افدتك ولو بحاجة بسيطة
عارف ان المقالة ناقصها مواعيد العمل والاوراق المطلوبة بس لسا معنديش علم بيهم اول ما هعرفهم هعدل المقال وهحدثها باذن الله
الموقع غير مسئول عن محتوى التعليقات و نرجو الإلتزام باللياقة في التعبير